Detaje të reja janë zbardhur nga operacioni i zhvilluar sot në qytetin e Korçës, ku forcat operacionale të Policisë së Shtetit ndërhynë në qendër të qytetit për kapjen e një personi të dyshuar.
Burime bëjnë me dije se i ndaluari është identifikuar si Ramadan Zoto, 43 vjeç, i cili është arrestuar për llogari të Drektorisë Vendore të Policisë Vlorë.
Gjatë kontrollit, Zoto është kapur me një pistoletë me fishekë në fole, çka e ka bërë të domosdoshme ndërhyrjen nga forcat e operacionales për shkak të rrezikshmërisë së lartë.
Ndërkohë, mësohet se aksioni policor në qytetin e Korçës vijon ende, dhe nuk përjashtohet mundësia e ndalimeve të tjera në kuadër të hetimeve.
