Vrasja e 34-vjeçarit Kristian Kola në Shkodër mbrëmjen e së enjtes dyshohet se është kryer nga vrasës me pagesë dhe është porositur nga të tjerë persona.
Në këtë përfundim ka arritur grupi i hetimit pas analizave të fakteve dhe provave të mbledhura në vendngjarje.
Autorët të cilët lëviznin me motor përdorën armë me silenciator për të mos tërhequr vëmendjen e kalimtarëve. Dyshohet se ata kanë ndjekur lëvizjet e viktimës për disa ditë me radhë deri në momentin e ekzekutimit.
Më herët, ata dyshohet se e kanë pikasur në zonën e Bardhajve, por nuk kanë arritur të veprojnë atëherë.
Ngjarja ndodhi përballë një lokali pranë zonës së Kinema ‘Republika’ në lagjen ‘Vasil Shanto’ në Shkodër, ku Kola po qëndronte me dy persona të tjerë. Sipas dëshmitarëve, autorët janë parë të qarkullojnë me motor përreth zonës, duke vëzhguar lëvizjet e viktimës. Kur dy personat që ndodheshin me Kolën u larguan, autorët përllogariten momentin e duhur për të goditur. Njëri prej tyre u ul nga motori dhe e qëlloi disa herë me pistoletë me silenciator, duke e lënë të vdekur në vend. Më pas, të dy u larguan me shpejtësi në drejtim të paditur.
Pavarësisht hetimeve intensive, autorët ende nuk janë identifikuar. Policia po verifikon nëse është përdorur i njëjti motor në të dy rastet e ndjekjes dhe atentatit. Deri më tani, pista kryesore e hetimit mbetet ajo e një atentati të porositur, ndërsa viktima nuk rezulton të ketë pasur precedentë penalë apo përfshirje në konflikte të njohura.
