Në lidhje me aksidentin rrugor të ndodhur dje në vendin e quajtur “Qafa e Koshovicës”, autoritetet kanë njoftuar se është kryer arrestimi në flagrancë i drejtuesit të automjetit, shtetasit E. Sh., 44 vjeç, banues në Patos.
Sipas njoftimit zyrtar, specialistët e Sektorit të Qarkullimit Rrugor bënë arrestimin pas veprimeve procedurale, pasi rezultoi se 44-vjeçari kishte humbur kontrollin mbi drejtimin e automjetit, duke bërë që ky i fundit të dilte nga rruga dhe të përmbysej.
Nga aksidenti mbetën të plagosur drejtuesi dhe tre pasagjerë që ndodheshin në automjet. Të katër të lënduarit u transportuan menjëherë në spitalin e Fierit, ku ndodhen nën kujdesin e mjekëve.
Policia vijon hetimet për të përcaktuar plotësisht rrethanat e ngjarjes dhe shkaqet që çuan në aksidentin e rëndë. Autoritetet u bëjnë apel drejtuesve të mjeteve të respektojnë rregullat e qarkullimit rrugor për të shmangur ngjarje të tilla me pasoja për jetën dhe shëndetin.
