Berisha nis betejën e re ligjore, rikthehet në Kushtetuese për të sfiduar arrestin që e mbajti të mbyllur për 331 ditë, kreu i PD e konsideron vendimin e SPAK dhe GJKKO një goditje të padrejtë ndaj lirisë së tij
Ish-kryeministri Sali Berisha ka nisur një kapitull të ri në betejën e tij ligjore, duke u rikthyer në Gjykatën Kushtetuese për të sfiduar vendimin që e mbajti të izoluar për 331 ditë në arrest shtëpiak. Ish-kryeministri dhe kreu i Partisë Demokratike e konsideron masën e vendosur nga Prokuroria e Posaçme (SPAK) dhe Gjykata e Posaçme Kundër Korrupsionit dhe Krimit të Organizuar (GJKKO) si një goditje të padrejtë ndaj lirisë së tij dhe një shkelje të drejtpërdrejtë të të drejtave kushtetuese. “Arresti shtëpiak”, i vendosur më 30 dhjetor 2023, e detyroi Berishën të qëndronte i kufizuar brenda banesës për një periudhë prej 331 ditësh, deri në heqjen e tij më 27 nëntor 2024. Avokatët e ish-kryeministrit theksojnë se prokuroria nuk arriti të provojë ekzistencën e rrezikut që Berisha mund të ndikonte tek dëshmitarët apo të prishte provat, duke e bërë këtë masë të tejskajshme dhe të panevojshme. Sipas mbrojtësve ligjorë, vendimi për arrest shtëpiak përtej çdo masë proporcionale përbën një shkelje të lirisë individuale dhe e vendos ish-kryeministrin në një pozitë të padrejtë.
Si Sali Berisha sfidoi vendimet e detyrimit dhe bllokimit të pasaportës
Kjo nuk është hera e parë që Berisha sfidon vendimet e prokurorisë. Më herët, Gjykata
Kushtetuese kishte shqyrtuar ankesat e tij për masën e detyrimit me paraqitje, për të cilën ish-kryeministri pretendonte se SPAK duhej të ishte drejtuar ndaj Kuvendit. Kushtetuesja vendosi se Berisha, në cilësinë e deputetit, nuk ka mbrojtje të veçantë në këtë aspekt, duke e bërë të tepërt autorizimin nga Parlamenti. Ndërkohë, për pikën e bllokimit të pasaportës, Gjykata i dha të drejtë Berishës, duke e konsideruar këtë masë të tejskajshme dhe jo proporcionale.
