Artistja e njohur shqiptare, Dafina Dauti, ka reaguar me emocione të thella dhe kritika të ashpra ndaj heshtjes së një pjese të komunitetit artistik shqiptar në lidhje me procesin gjyqësor që po zhvillohet në Hagë ndaj disa prej ish-krerëve të Ushtrisë Çlirimtare të Kosovës (UÇK).
Përmes një deklarate të sinqertë dhe të mbushur me emocion, ajo ka shprehur zhgënjimin e saj të thellë ndaj artistëve që, sipas saj, kanë zgjedhur të mos e japin përkrahjen e tyre për njerëzit që dhanë gjithçka për lirinë e Kosovës.
Dafina, e njohur për zërin e saj të fuqishëm dhe përkushtimin ndaj çështjeve kombëtare, është shprehur e befasuar nga mungesa e përfshirjes së shumë artistëve shqiptarë në protestën që është organizuar në mbështetje të liderëve të UÇK-së, të cilët aktualisht po përballen me gjykime në Dhomat e Specializuara në Hagë.
Ajo veçanërisht e ka vënë theksin te artistët e gjeneratës së mëparshme, për të cilët thotë se nuk e kupton heshtjen e tyre, pasi janë vetë ata që në të kaluarën i kanë kushtuar këngë e lavdi luftës çlirimtare dhe UÇK-së.
“Nuk e kuptoj pse artistët e gjeneratës më të vjetër nuk e përkrahin këtë protestë. Kanë qenë ata që i kanë kënduar UÇK-së, i kanë thurur vargje e i kanë ngritur në piedestal përmes artit të tyre, e sot, kur është momenti të tregojnë përkrahje të hapur, nuk ndihen askund. Kjo më befason tej mase. Është zhgënjyese,” ka thënë ajo, duke mos fshehur emocionet.
Artistja shprehet se e kupton që jo të gjithë mund të jenë fizikisht të pranishëm në protesta, për shkak të angazhimeve të ndryshme që mund t’i kenë pasur të planifikuara më herët, por sipas saj, mungesa e përkrahjes, qoftë edhe përmes platformave të rrjeteve sociale, është e pajustifikueshme. Ajo vëren se, në kohën e sotme, kur një status, një foto apo një shenjë përkrahjeje mund të ketë ndikim të madh, heshtja bëhet edhe më e rëndë.
“Secili mund të ketë pasur angazhime, data të zëna më herët, nuk mund të them që të gjithë duhet të jenë aty, fizikisht në protestë.
Por rrjetet sociale janë aty, janë mjeti më i fuqishëm sot për të shprehur mbështetje, për të treguar që je me zemër pranë atyre që po përballen me padrejtësinë. Dhe prapë, shumë prej tyre heshtën.
Kjo më lë pa fjalë,” është shprehur Dafina, duke lënë të kuptohet se për të, kjo mungesë përkrahjeje nuk është vetëm një çështje personale, por një çështje morale e kombëtare.
Më tej, Dafina ka folur me ndjenja të thella për historinë e Kosovës dhe luftën e Ushtrisë Çlirimtare, të cilën e ka cilësuar si një nga faqet më të ndritura dhe më të pastra të historisë kombëtare.
E prekur emocionalisht, ajo u shpreh se këto janë tri shkronja – UÇK – për të cilat çdo shqiptar duhet të ndjejë krenari të përjetshme. Ajo tha se do të bëjë çmos që fëmijët e saj, dhe brezat e ardhshëm, të mos harrojnë kurrë sakrificat e luftës dhe të kenë gjithmonë të qartë çfarë ka ndodhur në të kaluarën.
“Lufta e UÇK-së ka qenë shumë e pastër. Këto tri shkronja – U, Ç dhe K – janë pjesë e identitetit tonë kombëtar dhe janë shkronjat me të cilat do të krenohemi gjithë jetën.
Është përgjegjësia jonë që ta ruajmë këtë kujtim, që t’ua transmetojmë fëmijëve tanë, sepse ata nuk e kanë përjetuar luftën, nuk e dinë çfarë kemi kaluar. Ne duhet t’u flasim, t’u tregojmë të vërtetën, sepse kemi një histori për të cilën duhet të jemi krenarë,” tha Dafina, ndërkohë që u përlot gjatë rrëfimit të saj.
Ajo i bëri thirrje të gjithë prindërve shqiptarë që të flasin me fëmijët e tyre për historinë e luftës, për sakrificën që është bërë për të fituar lirinë, për dhimbjen që ka kaluar ky popull, por edhe për guximin dhe vendosmërinë që kanë treguar luftëtarët e UÇK-së.
Sipas saj, është detyrë morale e secilit prind dhe edukator të kujdeset që historia të mos harrohet, që trashëgimia e UÇK-së të jetojë brez pas brezi.
“Mendoj që familjarët duhet t’i ulin fëmijët dhe t’u flasin për një histori tonën, që histori më të bukur nuk ka asnjë popull. E di çka do të thotë me vdekë për liri të Kosovës? Është gjëja më e shenjtë.
Me dhanë jetën për liri, me dhanë gjymtyrët për liri – kjo është madhështore. Është një emocion që nuk përshkruhet me fjalë. Këto janë sakrifica që nuk guxojmë t’i harrojmë, as t’i anashkalojmë,” theksoi ajo me një ndjeshmëri që preku shumë njerëz.
Dafina shprehu indinjatën e saj për mënyrën sesi po trajtohen në Hagë figurat që, sipas saj, janë heronj të vërtetë të kombit shqiptar.
Ajo theksoi se këta njerëz janë duke u gjykuar padrejtësisht dhe se çdokush që ka ndërgjegje kombëtare duhet të jetë i pranishëm, me çfarëdo mjeti që ka në dorë, për të treguar mbështetje dhe për të kërkuar drejtësi.
“Kur flitet për ta, trupi rrënqethet dhe lotët dalin pa dashje.
Janë njerëz që kanë dhënë gjithçka për këtë vend, dhe sot po gjykohen padrejtësisht. Dhe t’i mos t’i përkrahësh ata njerëz – është e pakuptimtë për mua, nuk gjej fjalë çfarë të them.
Si mund të heshtësh përballë kësaj padrejtësie? Ku është zëri ynë si artistë, si popull, si bashkësi?” përfundoi artistja, duke bërë thirrje për reflektim dhe solidaritet të shtuar.
Deklaratat e Dafina Dautit kanë ngjallur reagime të shumta në opinionin publik dhe në rrjetet sociale, duke ndezur një debat të rëndësishëm mbi rolin e artistëve në çështje të mëdha kombëtare dhe mbi kujtesën historike të popullit shqiptar.
Ajo nuk e fshehu dhimbjen që ndjen për heshtjen që po mbizotëron në një moment kaq kritik, duke theksuar se heshtja nuk është neutralitet, por shpesh mund të kuptohet edhe si qëndrim.
Në një kohë kur drejtësia për UÇK-në është vënë në pikëpyetje dhe shumë shqiptarë ndihen të pambrojtur përballë akuzave që po ngrihen ndaj figurave kyçe të luftës, zëri i një artisteje si Dafina Dauti vjen si një thirrje e fuqishme për unitet, për ndërgjegje kombëtare dhe për ruajtjen e dinjitetit historik të një populli që e ka paguar shtrenjtë lirinë e vet./ORAinfo/
