Në foton e mësipërme është momenti kur 26-vjeçari Klejvis Caka alias Lusha largohet me vrap, pasi ka plagosur me armë zjarri 28-vjeçarin, Jukled Abazi në zonën e Freksut në kryeqytet, mbrëmjen e së shtunës.
Siç mund ta shihni në këto PAMJE të siguruar nga TV Klan, fiksuar nga kamerat e sigurisë në zonë, autori tashmë i shpallur në kërkim në dorë ka pistoletën me të cilën qëlloi 28-vjeçarin.
Për ngjarjen në fjalë, blutë e kryeqytetit njoftuan ditën e sotme arrestimin e 27-vjeçarit Xhonatan Qerimi, ndërsa u shpall në kërkim dhe miku i tij, 26-vjeçari Andi Gurra. Të dy ata akuzohen se kanë ndihmuar autorin pas ngjarjes dhe mbi ta rëndon akuza për veprën penale “Përkrahje e autorit të krimit”.
28-vjeçari, Jukled Abazi po lëvizte me automjetin e tij tip Mercedes Benz kur u qëllua me armë zjarri nga Klejvis Caka. Pas plagosjes i riu braktisi makinën e tij dhe u dërgua në spitalin e Traumës nga i kunati i tij.
Nga hetimet e deritanishme, policia dhe prokuroria e Tiranës ka dyshime se ngjarja ka ardhur pas një konflikti për motive të dobëta mes autorit dhe të plagosurit. Ky i fundit vijon të jetë në kujdesin e bluzave të bardha të spitalit të Traumës, ku mësohet se ndodhet jashtë rrezikut për jetën.
