Muaji korrik u shënua nga një ngjarje që tërhoqi vëmendjen e gjerë të publikut kosovar dhe më gjerë – dasma dhe kanagjegji i këngëtares së njohur Engjëllusha Salihu.
Kjo ceremoni nuk ishte vetëm një ngjarje familjare, por u kthye në një spektakël të vërtetë elegance, emocioni dhe përkushtimi, që pasqyroi dashurinë dhe afërsinë e fortë mes anëtarëve të familjes Salihu, si dhe vlerat tradicionale të ruajtura me shumë kujdes.
Engjëllusha, e njohur për zërin e saj të ëmbël dhe pamjen gjithmonë të kuruar, shkëlqeu në çdo paraqitje të saj gjatë kësaj periudhe festive.
Që nga kanagjegji madhështor deri te dita e dasmës, ajo u shfaq me një paraqitje të përsosur, ku çdo detaj – nga fustani, te aksesorët, grimi dhe sidomos modeli i flokëve – ishte i menduar dhe realizuar me shumë dashuri dhe profesionalizëm.
Ajo që e bëri këtë ngjarje edhe më të veçantë, ishte fakti se stili i flokëve dhe grimi i Engjëllushës u realizua nga motrat e saj – Gresa dhe Njomza Salihu.
Të dyja të njohura në fushën e bukurisë dhe stilimit, ato morën përsipër një rol të veçantë për këtë ditë të paharrueshme: të kujdeseshin që motra e tyre më e vogël të dukej si një princeshë, ashtu siç e kishte ëndërruar.
Sipas tyre, përgatitjet kishin filluar shumë më herët – madje që një muaj para dasmës, ato kishin ndjerë një ngarkesë të madhe emocionale dhe profesionale. “Nuk ishte vetëm një punë që duhej ta bënim si çdo kliente tjetër, por një përvojë shumë personale dhe e ngarkuar me emocione.
E dimë se sa e rëndësishme është kjo ditë për një vajzë, dhe kur ajo është motra jote, gjithçka bëhet edhe më e thellë,” u shpreh Njomza, e cila është e specializuar në grim.
Gresa, që njihet për aftësitë e saj kreative në stilimin e flokëve, rrëfeu se parapërgatitja për modelin e flokëve kishte zgjatur me javë.
“Engji e ka flokun shumë të dendur dhe të gjatë, ndaj deshëm të bënim diçka që i nxirrte në pah bukurinë natyrale, por njëkohësisht të ishte diçka unike. Zgjodhëm një stil romantik, të valëzuar, me elemente të buta tradicionale – që t’i përshtatej veshjeve dhe atmosferës së dasmës.”
Rezultati ishte mahnitës dhe i komentuar shumë në rrjetet sociale. Pamjet nga dasma u shpërndanë me shpejtësi, duke u bërë virale dhe duke tërhequr vëmendjen e shumë ndjekësve, që menjëherë kërkuan të dinë më shumë rreth modeleve të flokëve dhe grim të përdorur.
“Pas dasmës, na kanë kontaktuar shumë kliente që duan të kenë të njëjtin model si Engji. Kjo është një ndjenjë shumë e mirë, por edhe një përgjegjësi e madhe,” shtoi Gresa me buzëqeshje.
Grimi i realizuar nga Njomza ishte po ashtu i veçantë – i lehtë, por me fokus në theksimin e bukurisë natyrale të nuses.
Ajo vendosi të luajë me ngjyrat neutrale dhe nuancat pastel, për të krijuar një pamje të pastër dhe elegante që të mos errësonte emocionin e fytyrës së Engjëllushës.
“Kur e pamë të kompletuar, të veshur dhe të buzëqeshur, nuk i mbajtëm dot lotët. Ishte një emocion i papërshkrueshëm për të gjitha,” tregoi ajo.
Në fund, motrat e saj shprehën mirënjohjen për faktin që kishin mundësinë dhe besimin për ta bërë këtë ditë edhe më të bukur për Engjëllushën.
“Nuk ka krenari më të madhe sesa kur përgatit nusen që është motra jote. Kemi kaluar shumë momente të bukura gjatë përgatitjeve, dhe kjo do të mbetet përgjithmonë në kujtimet tona,” përfundoi Njomza.
Dasma e Engjëllushës, përveçse ishte një ngjarje emocionale për familjen Salihu, ishte edhe një pasqyrë e shkëlqyer e traditës, dashurisë familjare dhe forcës së lidhjeve mes motrave.
Ajo dëshmoi se kur dashuria dhe talenti bashkohen, krijohen momente që jetojnë përgjithmonë në kujtesën e njerëzve./ORAinfo/
