Ish-banorja e reality-show-t më të ndjekur në Kosovë, “Big Brother VIP Kosova 3”, Xheneta Fetahu, ka zgjedhur të ndajë me ndjekësit e saj një rrëfim të thellë emocional, ku për herë të parë flet hapur për përjetimet e saj psikologjike pas daljes nga shtëpia.
Modelja e njohur ka folur pa filtra për vështirësitë emocionale dhe shpirtërore me të cilat është përballur, duke lënë pas imazhin e vajzës së fortë dhe të buzëqeshur që publiku kishte parë brenda spektaklit.
“Kur dola nga ‘Big Brotherii’, kam qenë shumë keq. Kam qarë natë për natë, nuk guxoja të rrija vetëm, ndihesha e humbur dhe e braktisur”, shprehet ajo me një ton të ndjerë në videon që tashmë ka marrë shumë reagime dhe mbështetje nga ndjekësit.
Xheneta pranon se përjetoi një goditje të madhe psikologjike menjëherë pas daljes nga formati, një ndryshim drastik që ndodhi nga izolimi total për javë të tëra në një mjedis të mbyllur, në përballje të vazhdueshme me kamera, sfida, konflikte, emocione dhe gjykime publike, në një realitet krejtësisht të ndryshem nga jeta jashtë.
Sipas saj, përplasja me realitetin jashtë shtëpisë, menjëherë pas përfundimit të aventurës televizive, e tronditi thellë dhe i shkaktoi episode të shpeshta ankthi dhe sulme paniku.
“Gjithë ditën më kapte ankthi vazhdimisht. Nuk e kuptoja çfarë po ndodhte me mua. Edhe gjërat më të vogla më stresonin. Ndihesha sikur gjithë bota po më shikonte dhe po më gjykonte”, shpjegoi ajo me sinqeritet.
Rrëfimi i saj është një pasqyrim i ndjeshëm i asaj çfarë ndodh shpesh me personazhet publikë pas përfundimit të një formati kaq intensiv siç është “Big Brother”.
Për shumë ish-banorë, rikthimi në realitet është i vështirë, shpesh i mbushur me presion social, keqkuptime, përballje me komente negative dhe një mbingarkesë emocionale që është e vështirë për ta përballuar vetëm.
Këtë e dëshmon edhe Xheneta, e cila ka pranuar se për një kohë të gjatë nuk ndihej rehat as me njerëzit përreth, as me veten.
“Kam menduar disa herë ta fshija TikTok-un, ta mbyllja Instagramin, të zhdukesha pak nga sytë e publikut, por pastaj kuptova që nuk është zgjidhje.
Kam pasur nevojë për ndihmë dhe përkohësisht jam distancuar nga shumë gjëra për të pasur kohë me veten time”, tregon ajo më tej.
Megjithatë, në mesin e këtij rrëfimi emocional dhe të dhimbshëm, Xheneta dërgon edhe një mesazh shprese. Ajo ka bërë të ditur se me kalimin e kohës, situata ka filluar të përmirësohet.
“Tani jam pak më mirë. Kam filluar të marrë veten, të gjej pak qetësi, të kuptoj çfarë dua dhe si dua ta jetoj jetën time pas kësaj përvoje”, ka deklaruar ajo, duke theksuar se është në një fazë rikuperimi të ngadaltë, por të qëndrueshme.
Përfundimisht, rrëfimi i Xhenetës Fetahu nuk është thjesht një dëshmi personale, por edhe një pasqyrë reale e pasojave që mund të ketë ekspozimi i tepruar ndaj mediave dhe opinionit publik.
Me guximin për të folur hapur për shëndetin mendor, ajo ka fituar jo vetëm respektin e ndjekësve, por edhe vëmendjen e shumë personave që ndoshta kanë kaluar përvoja të ngjashme, duke i dhënë një zë të rëndësishëm ndjeshmërisë psikologjike që shpesh neglizhohet në botën e showbiz-it./ORAinfo/
