Prej disa ditësh, mediat rozë dhe rrjetet sociale janë përfshirë nga një valë spekulimesh që kanë ngjallur kurreshtje të madhe në publik.
Në qendër të këtij debati janë vënë dy emra të njohur për ndjekësit e mediave sociale: influencerja e njohur Hati Brika dhe biznesmeni i ri në moshë, por i suksesshëm, Enea Marku.
Zanafillën e këtyre zërave e mori një video që u publikua në “Instastory” nga festa e ditëlindjes së Hatit, ku u vu re prania e një burri që më pas u identifikua nga ndjekësit si Enea Marku.
Videoja u bë virale brenda pak orësh dhe përforcoi spekulimet për një lidhje të mundshme mes dyshes, aq më shumë kur u konstatua se festa kishte qenë mjaft intime dhe pothuajse e gjitha e përbërë nga mikeshat më të afërta të Hatit – gjë që e bëri praninë e një burri të vetëm të bie në sy dhe të interpretohet si diçka “më shumë se sa një mik i thjeshtë”.
Këto detaje u shoqëruan me një seri postimesh nga faqe të ndryshme që merren me jetën e personazheve publikë, të cilat sugjeronin se midis Hatit dhe Eneës po lindte diçka më tepër se miqësi.
Portale të ndryshme publikuan “burime të paemëruara” që aludonin për një njohje të afërt, takime të shpeshta dhe komunikime të vazhdueshme mes tyre.
Por pas gjithë këtij vorbulle lajmesh, më në fund ka ardhur reagimi zyrtar nga vetë personi që është vënë në qendër të vëmendjes.
Në një deklaratë publike përmes profilit të tij zyrtar në rrjetet sociale, Enea Marku vendosi t’i japë fund njëherë e mirë këtyre thashethemeve, duke mohuar kategorikisht çdo përfshirje apo marrëdhënie me Hati Brikën.
“Dua të ndaj me të gjithë një sqarim shumë të rëndësishëm, sepse kohët e fundit po qarkullojnë lajme, thashetheme dhe spekulime rreth meje, Enea Marku, dhe një personi tjetër me emrin Hati,” shkruan ai. “Dua të them qartë dhe pa asnjë dyshim: asgjë nga këto nuk është e vërtetë.”
Ai vazhdon më tej me një ton më të ashpër, duke kritikuar portale dhe faqe që sipas tij po përhapin informacion të rremë dhe duke i cilësuar lajmet si tërësisht të shpikura.
“Bëhet fjalë për gënjeshtra të plota, të shpikura dhe të përhapura nga portale që nuk kanë asnjë lidhje me të vërtetën. Jam i befasuar dhe njëkohësisht i zhgënjyer që njerëzit janë të gatshëm të besojnë gjithçka që u serviret pa asnjë provë apo fakt konkret,” shkruan Marku.
Ai sqaroi qartë se nuk ka asnjë marrëdhënie personale apo sentimentale me Hatin, dhe se çdo insinuatë në këtë drejtim është keqdashëse dhe e bazuar në keqinterpretime apo qëllime për të dëmtuar imazhin e tij.
“Nuk kam asnjë marrëdhënie me personin që përmendet, dhe çdo insinuatë në këtë drejtim është e rreme dhe keqdashëse. Nuk e di se kush fshihet pas këtyre shpifjeve, por është e qartë që synimi është të më dëmtohet reputacioni,” shtoi ai më tej.
Në fund të reagimit të tij, Enea Marku bëri thirrje për respekt ndaj jetës së tij private dhe kërkoi nga ndjekësit, media dhe opinioni publik që të mos i japin hapësirë gënjeshtrave.
“Të gjithë meritojmë hapësirë dhe qetësi në jetën tonë personale. Kërkoj mirëkuptim dhe falënderoj nga zemra të gjithë ata që më kanë kontaktuar për të më mbështetur dhe për të më treguar besim në këtë situatë të pakëndshme,” përfundon ai deklaratën.
Nga ana tjetër, deri tani Hati Brika nuk ka reaguar publikisht mbi këto spekulime dhe as për deklaratën e Markut. Ajo ka vazhduar aktivitetin e saj normal në rrjetet sociale, duke postuar imazhe nga projektet e saj të fundit si influencuese, por pa bërë asnjë aludim për këtë situatë.
Ndërsa publiku ndan mendime të ndryshme rreth kësaj ngjarjeje, një gjë është e sigurt – përfshirja e personazheve të njohur në thashetheme të tilla, edhe kur janë të pabazuara, është një realitet me të cilin duket se do të përballen gjithmonë ata që janë në sy të publikut.
Por ndërsa dikush zgjedh të heshtë, të tjerë si Marku, vendosin të reagojnë fort për të mbrojtur imazhin dhe të vërtetën e tyre.
