Një ngjarje tragjike ka ndodhur në Brazil, ku një moment intim mes një çifti përfundoi me vdekje. Adriana Ribeiro, 42 vjeç, dhe partneri i saj Marcone Cardozo, 26 vjeç, humbën jetën pasi automjeti i tyre ra nga një shkëmb në një zonë panoramike të qytetit Venda Nova do Imigrante.
Çifti ishte kthyer nga një festë dhe kishte ndaluar në një vend të njohur për pamjen e bukur natyrore, ku dyshohet se kishin vendosur të kryenin marrëdhënie seksuale brenda në makinë. Sipas hetimeve paraprake, lëvizjet brenda automjetit mund të kenë shkaktuar zhvendosjen e tij, pavarësisht se frena e dorës ishte aktive.
Makina ra nga një lartësi prej rreth 100 metrash, duke goditur një shkëmb dhe përfunduar në fund të një zone të pyllëzuar. Trupat e çiftit, të cilët u gjetën të zhveshur, dolën nga makina si pasojë e përplasjes.
Aksidenti ka ndodhur rreth orës 1 të mëngjesit të së hënës së kaluar, por automjeti u vu re vetëm në orën 7 të mëngjesit nga një roje sigurie. Sipas detektivit Alberto Roque Perez, nuk ka asnjë shenjë që të sugjerojë ndonjë akt kriminal. Ai tha se ngjarja ka shumë gjasa të jetë një aksident i shkaktuar nga lëvizjet e çiftit brenda mjetit.
Banorët lokalë raportuan se kishin dëgjuar një zhurmë të fortë në mesnatë, por errësira dhe terreni i vështirë nuk u kishte lejuar të kuptonin çfarë kishte ndodhur.
Zjarrfikësit që mbërritën në vendngjarje e gjetën burrin pranë rrënojave të automjetit, ndërsa për të lokalizuar gruan u desh të hapnin një shteg përmes bimësisë së dendur. Sipas dëshmitarëve, makina ishte bërë copë pas përplasjes.
Zona ku ndodhi tragjedia është e njohur për terrenin e thyer dhe shkëmbinjtë e thepisur, çka e bëri edhe më të vështirë operacionin e kërkim-shpëtimit.
