Forumi i Familjeve të Pengjeve Izraelite ka njoftuar se rreth 500 mijë njerëz u mblodhën të dielën në mbrëmje në Sheshin e Pengjeve dhe rrugët përreth në Tel Aviv, në një protestë të madhe që kërkonte nga qeveria izraelite arritjen e një marrëveshjeje për lirimin e pengjeve.
Sipas deklaratës së Forumit, të cituar nga Times of Israel, demonstrata kishte për qëllim të dërgonte një mesazh të qartë: “I gjithë populli izraelit dëshiron lirimin e të gjithë pengjeve dhe fundin e luftës.”
Organizatorët thonë se numri i përgjithshëm i protestuesve në dhjetëra demonstrata të mbajtura njëkohësisht në mbarë Izraelin ka arritur në një milion vetë. Ndërkohë, autoritetet izraelite nuk kanë dhënë ende shifra zyrtare për pjesëmarrjen.
Që prej sulmit të 7 tetorit nga grupi Hamas, qindra persona u morën peng dhe u dërguan në Rripin e Gazës. Një pjesë e tyre janë liruar gjatë ndërmjetësimeve të mëparshme, por dhjetëra të tjerë mbeten ende në duart e Hamasit.
Familjet e pengjeve prej muajsh po organizojnë protesta të vazhdueshme, duke kërkuar nga qeveria e Benjamin Netanyahut të arrijë një marrëveshje me Hamasin, qoftë edhe përmes ndërmjetësimit ndërkombëtar. Deri tani, bisedimet për shkëmbimin e pengjeve me të burgosur palestinezë kanë hasur vështirësi, ndërsa lufta në Gaza vijon me intensitet.
Top Channel
